Се случи уште еден фемицид и сите надлежни институции кои со години игнорираат, минимизираат, релативизираат, поттикнуваат и дозволуваат континуирано насилство врз жените се виновни. И полицијата, центрите за социјална работа, обвинителството и судовите. Виновен е и образовниот систем, кој место да промовира родова еднаквост, солидарност и емпатија и да осудува родово базирано насилство, со својот пристап директно придонесува кон креирање на сексисти и насилници.
Ова го изјави Калиа Димитрова од феминистичкиот портал „Медуза“ пред Министерството за внатрешни работи, од каде вечерва почна протест по случајот со двојното убиство и самоубиство во Велес. На 15 септември 2025 година Р.К. (31) од Велес беше убиена од нејзиниот поранешен партнер И.С (39) од Скопје, кого неколку пати го пријавувала за насилство. Организатор на протестот е Хелсиншкиот комитет за човекови права,
Според Димитрова, покрај страшната некоординарност и затајувањето на институциите надлежни за справување со насилството врз жените, кон фемицидите предизвикуваат и молкот, стигмата, срамот и немањето чувство за колективна одговорност. – Ова е заеднички проблем, затоа оваа смрт е резултат на институционална и социјална негрижа. Ова не е изолиран случај, туку резултат на секојдневие кое ги дехуминизира жените. Изборот да му се верува на насилникот, место на жртвата директно придонесува на ескалација на насилство, рече Димитрова.
Росица, како што рече, немаше да биде убиена доколку се постапувало според професионални ингеренции и попишани протоколи. – Доколку криците за помош беа слушнати, а реакациите навремени и доколку сите претходни пријави против нејзиниот убиец од негови претходни жртви беа сфатени сериозно. Каде се тие пријави? Постапил некој по нив или се дозволило листата на жртви да расте?, изјави Димитрова. Посочи дека во изминатите пет години починале најмалку 20 жени како кулминација на повторени епизоди на родово базирано насилство.
Марта Стевковска од мрежата „Стела“ изјави дека бараат институционална одговорност и санкции, оставки на одговорни службени лица и покренување дисциплински постапки против полицајци, обвинители, судии и центри за социјална работа кои не постапиле по пријавите за насилство и закани во овој и слични случаи. Бараат формирање независна истрага за институционалните пропусти во случајот.
Учесниците извикуваа „Ниту една повеќе!“ и носеа транспренти на кои беше испишано „Од непостапување – до погребување“, „Направете специјална полициска единица која веднаш ќе реагира по пријава“, „Сите ние сме Росица“… Протестот заврши кај паркот „Жена борец“.