Пратеничката група на СДСМ денеска официјално поднесе интерпелација за работата на министерот за земјоделство, Цветан Трипуновски. Пратеникот Љупчо Николовски, на прес-конференција, го обвини ресорниот министер за „неспособност, криминални политики и системска корупција“ кои, според опозицијата, го довеле земјоделскиот сектор до колапс.
Николовски посочи дека Министерството во изминатите две години се претворило во „приватна фирма за бизнис интереси“, а наместо развојни проекти, јавноста сведочела на бројни скандали. Како клучни аргументи за барањето за оставка, СДСМ ги наведе:
Николовски потсети на апсењата на директорите на Платежната агенција и на Инспекторатот за земјоделство, кои беа фатени при примање мито, што според него е доказ за воспоставен систем на корупција.
СДСМ ја обвини власта за суспензија на 128 милиони евра европски средства, што ја ставило земјата во подредена позиција во регионот.
Според опозицијата, буџетот за земјоделците е скратен, при што субвенциите за тутун, сточарство и други култури се намалени, додека лимитот за субвенции за големите фирми е зголемен на 1 милион евра.
Како спорни се посочени и укинувањето на авансната исплата на субвенциите, програмите за мали производители и недостатокот на капитални проекти и наводнување.
„Овој министер нема капацитет, нема легитимитет и нема право да ја води оваа институција. СДСМ ќе бара политичка, а потоа и кривична одговорност за секоја штета и за секој криминал“, порача Николовски.