Министерот за транспорт, Александар Николоски, во рамки на Самитот „Македонија 2025“ оствари средба со претставници на организацијата и нивни блиски соработници, со кои разговараше за промоција на земјава на светската сцена и за економските реформи.
Николоски преку социјалните мрежи информираше за деталите од разговорите, потенцирајќи ја улогата на истакнатите претставници на македонската дијаспора во Канада.
„Во рамки на Самитот „Македонија 2025“ остварив значајна средба со нашите долгогодишни пријатели на Македонија, Џон и Јордан Битов сопственик на најголемиот дневен весник во Канада „Toronto Star“, како и со Марко Мендасино, поранешен министер, член на Парламентот на Канада и член на Владата“, објави Николоски.
Тој упати признание до семејството Битов за нивниот долгогодишен ангажман и лобирање за македонските интереси уште од прогласувањето на независноста.
„Семејството Битов игра водечка улога во нашата дијаспора, заслужни се за многу успеси на Македонија од самостојноста до денес“, подвлече вицепремиерот.
Примарниот фокус на разговорите бил насочен кон искористување на потенцијалите на иселеништвото во клучните општествени сектори преку трансфер на знаења и нови технологии.
„Разговаравме за економските политики на Македонија, размена на знаење, употреба на дигитални технологии, поддршка за образованието, здравството и институциите“, се вели во објавата.
Николоски заклучи дека пријателите на државата во странство остануваат важен столб за нејзиниот понатамошен развој.
„Со заедничка работа и партнерство, Македонија може побрзо да напредува и да стане посилна и поконкурентна држава“, порача тој.