Вицепремиерот и министер за транспорт, Александар Николоски, денеска од Крушево упати порака по повод 2 Август – Илинден, нагласувајќи дека овој датум го симболизира вековниот стремеж на македонскиот народ за слобода и сопствена држава.
Во своето обраќање, тој го истакна историскиот континуитет на македонската борба.
„Втори август Илинден, денот на Илинденското востание и денот на Антифашистичкото собрание за народно ослободување на Македонија. Втори август – Илинден е доказ за борбата на македонскиот народ, за своја самобитност и за своја државност, идеал кој што почна да се гради некаде во 19. век преку преродбата, понатака двете македонски востанија, Кресненското и Разловечкото, ја имаше својата круна на Илинденското востание во 1903 година, понатака преку Антифашистичката борба во Втората светска војна и АСНОМ на 2.август 1944 година, и својата кулминација ја доживеа на 8. Септември 1991 година кога Македонија прогласи независност“, подвлече Николоски.
Министерот посочи дека денес почитта кон минатото се искажува преку развојот и реализацијата на инфраструктурни проекти.
„Денес Македонија ја градиме како модерна европска држава, денес Македонија се гради како никогаш претходно, нема дел од државата во којшто не се реализираат проекти, дали се тоа преку 1200 општински проекти, дали се големите инвестиции во железницата и автопатиштата“, истакна Николоски.
Тој ги наведе конкретните активности во патниот и железничкиот сообраќај, како и развојот на авиосообраќајот.
„Македонија во моментов како никогаш претходно гради 6 автопати, гради железница на Коридорот 8, а за брзо ќе почне и на Коридорот 10, Македонија ги развива своите аеродроми, целосно го реконструира и надградува охридскиот аеродром, расте скопскиот аеродром, со најголем раст од цела југоисточна Европа, и така ќе продолжиме да работиме и во периодот кој што е пред нас. Затоа што само инвестициите, само работата, ќе го зајакната темелот на македонската држава, ќе го постават темелот на македонскиот народ, и на сите кои што живеат во Македонија, онаму каде што му е местото, а тоа меѓу најразвиените европски нации“, порача Тој.
На крајот, Николоски оддаде почит кон сите кои ги дадоа своите животи за државноста.
„Поклон кон жртвата на хероите, денеска треба да се сеќаваме на нив, како и секој друг ден и тие да ни се водилка за се’ она што го правиме за Македонија“, истакна Николоски.