Македонските компании во иднина многу побрзо и поефикасно ќе ги спроведуваат законските постапки поврзани со надворешната трговија, откако денеска беше потврдено склучувањето на договорот за нов едношалтерски систем (НЕС).
Проектот се позиционира како еден од најзначајните чекори за дигитализација и модернизација на постапките со увозот, извозот и транзитот на стоки во земјава.
Заменик-претседателот на Владата и министер за транспорт, Александар Николоски, претседаваше со Комитетот за управување со НЕС, каде официјално беше затворена тендерската постапка и избран најповолниот понудувач.
Според потпишаниот договор, избраниот конзорциум има прецизна обврска до крајот на 2027 година целосно да го операционализира софтверот и да го стави во функција.
Новиот систем ќе овозможи сите дозволи, како и плаќањата за нив, да се одвиваат по електронски пат на една единствена точка, со што ќе се скрати времето на чекање по институциите.
Реформата има за цел да ја олесни трговијата преку рационализација на процесите и да овозможи брза размена на податоци меѓу сите надлежни национални институции.
„Република Македонија е дел од проектот за олеснување на транспортот и трговијата во земјите од Западен Балкан каде една од компонентите е имплементацијатa и овој Национален Едношалтерски Систем што подразбира целосна замена на тековниот систем за управување со дозволи за увоз, извоз и транзит на стоки со нов систем“, се вели во официјалното соопштение од Министерството за транспорт.