Вицепремиерот и министер за транспорт Александар Николоски вечерва присуствуваше на настан во организација на новото раководство на Унијата на млади сили на ВМРО-ДПМНЕ – Струмица.
Николоски порача дека пред државата и политичката партија претстојат бројни предизвици, а младите треба да имаат активна улога во процесите што следуваат.
„ВМРО-ДПМНЕ е најсилна и најобединета од своето основање и во тој дух и таа енергија треба да продолжи. Во овој момент постои ажурирање на членството, како и прием на нови членови. Вратите се широко отворени“, порача Николоски, повикувајќи ги поддржувачите на политиките на ВМРО-ДПМНЕ да се зачленат во партијата.
Тој истакна дека Унијата на млади сили има активна улога во партиските активности, особено во периодот што следува, кога, како што рече, државата е пред сериозни одлуки, а партијата пред бројни активности.
Во однос на економските движења, Николоски посочи дека Македонија, според него, бележи економска и политичка стабилност.
„Растеме во економијата. Во вториот квартал имавме раст од 4,3 отсто, што е трет највисок раст во Европа. Политички сме стабилни, имаме стабилна Влада поддржана од огромно мнозинство во Собранието и ги реализираме проектите кои ги ветивме“, изјави Николоски.
Тој додаде дека, според него, Македонија економски напредува и политички е стабилна, а Владата, како што рече, го чува достоинството на македонскиот народ и на граѓаните кои ја поддржале.
Николоски упати порака и до младите членови на УМС, од кои очекува во иднина да преземат одговорност и да заземат значајни позиции.
„Се надевам дека сите кои се денес членови на Унијата на млади сили, раководството на општинските комитети и Извршниот комитет на УМС, се луѓето кои во следниот период ќе заземат значајни позиции и ќе преземат одговорност за иднината на државата“, рече Николоски.
Како дел од активностите што следуваат, тој ги спомена и предвремените избори во општина Брвеница, како и потребата од вклучување на нови и млади кадри во политичките и државните процеси.