Кризниот штаб на Општина Куманово донесе низа мерки за справување со последиците од силното невреме што го зафати градот и околните населени места.
Најголеми оштетувања има на електродистрибутивната мрежа, а надлежните информираат дека расчистувањето на паднатите дрвја и санацијата на штетите ќе продолжат и во следните денови.
На седницата на Кризниот штаб, свикана по предлог на Центарот за управување со кризи, било констатирано дека силниот ветер предизвикал значителни оштетувања на инфраструктурата, електричната мрежа, приватните имоти и земјоделските површини.
Секретарот на Општина Куманово, Емилија Сларидис-Јаневска, информираше дека најпогодена е ЕВН, каде се регистрирани повеќе од 100 паднати столбови за електрична енергија и над 400 дефекти на дистрибутивната мрежа. Досега се санирани 342 дефекти, а снабдувањето со електрична енергија во градот е речиси целосно нормализирано.
„Најкритична останува состојбата во селото Клечовце и дел од руралните средини во Куманово и Старо Нагоричане, каде паднати тополи ја оштетиле електричната мрежа. На терен заеднички работат екипи на ЕВН, ЈП „Национални шуми“ и ЈП „Чистота и зеленило““, изјави Сларидис-Јаневска.
Од Кризниот штаб упатија апел до месните заедници да се вклучат во расчистувањето, бидејќи ЈП „Чистота и зеленило“ нема надлежност и механизација за отстранување на големи дрвја надвор од урбаните подрачја.
Граѓаните кои имаат дрвја што претставуваат опасност можат да ги пријават во Општина Куманово, по што општинска комисија ќе изврши увид и ќе предложи соодветни мерки.
Телефонските линии на Општината остануваат отворени за пријавување штети. Досега се доставени девет писмени барања за надомест на штета, а уште десетина граѓани телефонски ја пријавиле состојбата.
Директорот на ЈП „Чистота и зеленило“, Сашо Томиќ, информираше дека службите интензивно работат на отстранување на паднатите дрвја од парковите, булеварите и другите јавни површини.
„Ресурсите ни се ограничени и ќе бидат потребни неколку дена за целосно расчистување на сите паднати дрвја. Нема простор за паника, состојбата е под контрола и ќе ги отстраниме сите дрвја што претставуваат опасност за граѓаните“, рече Томиќ.