Синоќешното силно невреме во Крива Паланка, проследено со обилни врнежи од дожд, силен ветар и интензивни електрични празнења, беше причина општината да го одложи големиот празничен концерт што требаше да се одржи на отворено, на градскиот стадион и истиот да го закаже за вечерва, во истиот термин во 20 часот.
На концертот по повод 29 август, празникот на Свети Јоаким Осоговски, светецот – заштитник на Крива Паланка ќе настапат познатиот македонски пејач Слаткар, Ацо Пејовиќ и балканската музичка ѕвезда Лепа Брена.
Од општината велат дека одлуката била донесена пред сè во интерес на безбедноста на публиката, изведувачите и сите лица вклучени во организацијата, како и поради неопходноста од целосна проверка и безбедно ставање во функција на сценската и техничката опрема.
-Поради неповолните временски услови и последиците од силното невреме, вчерашниот концерт на градскиот стадион во Крива Паланка се одложи за вечерва. Надлежните служби и организациските тимови се на терен и ги превземаат сите неопходни активности за да концертот се одржи во безбедни услови и целосно подготвен амбиент. Терминот и најавената програма остануваат непроменети, се наведува во соопштението од прес-службата на општината.
Оттаму им се заблагодарија на граѓаните, посетителите, изведувачите и сите вклучени во организацијата за разбирањето, трпението и поддршката.
Поради празничните денови, продолжениот викенд и богатата културна програма што ја организира Општина Крива Паланка и најавениот концерт, сите сместувачки капацитети во градот се исполнети, а дополнително, синоќа во Крива Паланка со приватни возила и организирани групни превози пристигнаа голем број гости од разни градови од државата, но и од соседна Србија и Бугарија.
Во централното градско подрачје на Крива Паланка во текот на вчерашниот ден беше воведен посебен сообраќаен режим којшто ќе се применува и денес,а општината обезбеди и повеќе локации за бесплатно паркирање.