Управата за хидрометеоролошки работи (УХМР) информира за развој на нестабилна облачна маса која веќе предизвика невреме во делови од државата.
Според најновите набљудувања на синоптичарите, моментално најкритично е во источниот дел на Македонија.
„Во Пробиштипско – Кочанскиот регион имаме нестабилност проследена со интезивни поројни врнежи од дожд , електрични празнења и наместа појава на град“, соопштија од УХМР.
Покрај овој регион, нестабилни воздушни маси се развиваат и во други делови од земјата, каде веќе се бележат првите врнежи и грмежи.
Од Управата додаваат дека „југоисточно од Скопје и на падините на Шар Планина имаме појава на слаба нестабилна облачна маса проследена со пороен дожд и грмежи“.
Граѓаните кои се движат во овие региони се повикуваат на претпазливост, особено поради најавените електрични празнења и појавата на град.