Израелскиот премиер Бенјамин Нетанјаху официјално побара помилување од претседателот Исак Херцог во врска со долгогодишното судење за корупција што се води против него.
Канцеларијата на Херцог потврди дека писмата се примени и од Нетанјаху и од неговиот правен тим. Барањето сега влегува во формална процедура и ќе биде проследено до Министерството за правда, кое треба да собере мислења од надлежните органи пред претседателот да ја донесе конечната одлука.
„Канцеларијата на претседателот е свесна дека ова е вонредно барање кое носи значајни импликации. Откако ќе ги добие сите релевантни мислења, претседателот одговорно и искрено ќе го разгледа барањето“, соопштија од кабинетот на Херцог.
Судењето на Нетанјаху трае повеќе од пет години под обвинение дека примал луксузни подароци – накит, пури и розов шампањ во вредност од околу 174.000 евра од богати соработници. Премиерот цело време ги негира обвиненијата, нарекувајќи го процесот „лов на вештерки“.
Овој потег доаѓа по јавната поддршка од американскиот претседател Доналд Трамп, кој во средината на ноември испрати писмо, а претходно и во говор пред Кнесетот побара помилување за израелскиот лидер.