Бугарија ја потресуваат најмасовните протести во последните години, откако десетици илјади граѓани излегоа на улиците во Софија и во повеќе градови низ земјата, изразувајќи незадоволство од економските политики, корупцијата и работењето на владата. Според бугарските медиуми и изјавите на организаторите, „немало таков протест досега“ поради бројноста и интензитетот на демонстрациите.
Околу 150 илјади луѓе протестираа во Софија против Делјан Пеевски и Бојко Борисов
Незадоволството ескалираше по објавата на нацрт-буџетот за 2026 година, кој предвидува зголемени придонеси и даночни оптоварувања, што дополнително ги вознемири граѓаните во услови на економска криза. Иако владата повлече дел од предложените мерки, протестите продолжија и прераснаа во пошироко движење со политички барања.
Граѓаните бараат оставка од владата, поефикасна борба против корупцијата и економски политики кои нема да го оптоваруваат стандардот. Масовни собири се одржаа не само во Софија туку и во Пловдив, Варна, Бургас и други градови.
Аналитичарите оценуваат дека протестите претставуваат сериозен притисок врз бугарската влада и дека политичката криза може да се продлабочи доколку властите не понудат јасни чекори за решавање на причините за незадоволството.
Демонстрациите продолжуваат, а организаторите најавуваат нови собири доколку барањата не бидат исполнети.