Српската полиција, во рамки на продолжението на обемната операција „Армагедон“, уапси седум лица под сомнение за производство и поседување детска порнографија. Уапсените се на возраст од 24 до 72 години од Белград, Сомбор, Ниш и Нови Сад.
Осомничените се товарат дека подолг временски период преку т.н. „DarkWeb“ преземале, складирале и споделувале материјали со содржина од сексуална експлоатација на деца. При претрес во нивните домови, пронајдени се неколку гигабајти фотографии и видеа на кои е прикажана тешка злоупотреба на деца на возраст од 4 до 14 години.
„Операцијата ‘Армагедон’ испраќа јасна порака дека Министерството за внатрешни работи нема да толерира никаква форма на злоупотреба на деца и дека дигиталниот простор не е анонимно засолниште за сторители на вакви кривични дела“, соопштија од српското МВР.
На осомничените им е одреден притвор до 48 часа, по што со кривична пријава ќе бидат изведени пред надлежното обвинителство во Белград.