Неделков: Се зголемува бројот на колеги и колешки кои штрајкуваат, се надеваме на прифатлив предлог од Владата
Претседателот на Самостојниот синдикат за образование, наука и култура (СОНК), Јаким Неделков испрати порака преку Фејсбук за да ја извести јавноста за случувањата во вториот ден од штрајкот.
„СООПШТЕНИЕ до јавноста
Почитувани колешки и колеги,
Почитувани медиуми,
Почитувани родители и ученици,
Почитувана јавност,
Со ова соопштение сакаме да ве информираме за текот на вториот ден од Генералниот штрајк на вработените во детските градинки, основните и средните училишта, за остварување на социјалните барања, а во организација на СОНК.
Во текот на денешниот ден, сите синдикални организации на СОНК се во Генерален штрајк, дополнително со зголемен број на колешки и колеги кои се приклучиле кон штрајкот. Посериозни проблеми или притисоци врз штрајкувачите не се регистрирани до овој момент, а доколку има такви дејствија и пристигнат Изјави до нас, јавноста ќе биде благовремено информирана.
Во текот на денешниот ден очекуваме покана за работна средба од страна на надлежните институции, а за времето на одржување на средбата и резултатите од неа, ќе бидете дополнително информирани.
СОНК се надева дека ресорните министерства или Владата ќе излезат со конкретен и прифатлив предлог за зголемување на платите во гореспоменатите дејности односно со предлог кој ќе биде прифатлив од мнозинството на членови на СОНК. Со тоа би се донело, во најкраток можен рок, одлука за прекин на штрајкот и продолжување на нормалниот тек на воспитно - образовниот процес“, напиша Неделков.
12.04.2022 - 13:49
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
