Верниците во Македонија неделава одбележуваат два големи христијански празници. Во среда, на 6 мај, се слави Светиот великомаченик Георгиј – Ѓурѓовден, додека во петок е празникот посветен на Светиот апостол и евангелист Марко.
Свети Георгиј, роден во Кападокија, е еден од најпочитуваните светители кој поради својата вера во Христа претрпел страшни маки за време на царот Диоклецијан.
„Сиот разгорен од љубов кон Господ Христос, Свети Георгиј без тешкотии остави сè заради својата љубов: чин, богатство, царски почести, пријатели и сиот свет. За оваа љубов Господ го награди со венец на невенлива слава“, се наведува во житието за светителот кој бил убиен во 303 година.
Веднаш по Ѓурѓовден, во петок на 8 мај, се празнува Марковден. Свети Марко бил сопатник на апостолот Петар и автор на едно од четирите евангелија.
Како прв проповедник на христијанството во Египет, Марко основал цркви и поставувал епископи, за што на крајот бил мачен и убиен од незнабошците во Александрија.
„Сиот измачен и истоштен Свети Марко изусти: ’Во Твоите раце, Господи, го предавам мојот дух!‘ и издивна“, стои во записите за неговото страдање.
Двата празници се длабоко вкоренети во македонската традиција и се прославуваат со бројни обичаи и семејни собири.