Премиерот Христијан Мицкоски категорично ги отфрли тврдењата на опозициската СДСМ дека Владата ангажирала странска приватна разузнавачка компанија со цел следење на опозициското раководство и фабрикување афери. Во својата изјава, премиерот ги оцени овие обвинувања како неосновани и порача дека фокусот на неговата работа останува на економските прашања.
„Што се однесува до некакви компании за да го следат раководството на СДСМ, мислам дека таков тип на однесување од наша страна не постои. Тоа не е дел од мојот карактер, ниту имам намера да се занимавам со такви естрадни политики. Јас сум фокусиран на развојот на државата и подобри услови за живот на граѓаните“, изјави Мицкоски.
Претходно, од СДСМ излегоа со сериозни обвинувања, тврдејќи дека власта ја ангажирала израелската приватна разузнавачка компанија „Блек кјуб“. Според опозициската партија, компанијата била користена за следење на опозицијата и прибирање информации за нејзина дискредитација. СДСМ тврди дека претставници на оваа компанија веќе оствариле состаноци во Скопје со лица блиски до власта и со бизнисмен кој наводно го финансирал ангажманот, оценувајќи го овој потег како показател за „автократски модел“ на владеење.
Од Владата, пак, повторуваат дека ваквите наводи се невистинити и порачуваат дека приоритет на извршната власт останува справувањето со актуелните предизвици со кои се соочуваат граѓаните.