Православните верници денеска, 29 септември, го одбележуваат споменот на Светата великомаченичка Ефимија, како и на Преподобниот Доротеј и Свети Кипријан, митрополит Киевски. Овие светители се дел од верскиот календар на Македонската православна црква.
Света великомаченичка Ефимија била родена во Халкидон, во семејство на благочестиви христијани. Според црковното предание, пострадала во 304 година поради својата христијанска вера, откако била подложена на различни мачења. Нејзиниот спомен во црковниот календар се одбележува и на 11 јули.
На денешен ден се споменува и Преподобниот Доротеј, египетски пустиножител кој, според преданието, 60 години се подвизувал во Тиваида. Се одликувал со трудољубивост, а деновите ги поминувал во работа за монашката заедница и молитва.
Се празнува и Свети Кипријан, митрополит Киевски, родум од Трново и ученик на Света Гора. Како митрополит во Киев, според црковните записи, поминал речиси 36 години и оставил значаен придонес во црковниот живот и книжевната дејност. Се упокоил во 1406 година.
Во народната традиција, денешниот ден се поврзува со истрајноста, вистината и мирот. Се верува дека треба да се избегнуваат расправии и инаетење, а несогласувањата да се решаваат смирено. Денот би требало да се помине умерено, без претерано веселеење, јадење и пиење.