Речиси е невозможно да се најде место во Западна Европа кое во моментов не доживува незапаметен и екстремен топлотен бран. Температурите во Велика Британија достигнаа високи 35°C, што е за повеќе од 2°C над претходниот историски рекорд за месец мај.
Британската метеоролошка служба алармира дека ваквата топлина би била исклучителна и невообичаена дури и за средината на летото, а камоли за овој период од годината.
Слична е состојбата и во Франција, која е зафатена од невиден бран жештини, а метеоролошката служба „Метео-Франс“ веќе објави за стотици срушени температурни рекорди низ целата земја.
Како што пренесува „Би-Би-Си“, Ирска исто така го сруши својот мајски рекорд за повеќе од еден степен, додека Германија, Италија, Шпанија и Швајцарија се соочуваат со тропски пролетни услови.
Светските научници се во тотален шок од брзината со која се менува климата.
„Едноставно е неверојатно. Апсолутно е лудо“, изјавија професорката Фридерике Ото од Империјал колеџ во Лондон и Питер Торн, директор на Центарот за климатски истражувања во Ирска.
Непосредна причина за овој топлотен бран е таканаречената „топлотна купола“, феномен во кој област со висок атмосферски притисок се заробува над Европа, не дозволувајќи му на топлиот воздух да излезе. Научниците немаат сомнеж дека климатските промени предизвикани од човекот дополнително ја влошиле состојбата.
Според климатската служба „Коперникус“, Европа се затоплува со стапка од 0,56°C по деценија во последните 30 години, што е повеќе од двојно од глобалниот просек. Екстремните жештини веќе не се ограничени само на нашиот континент, па така во Делхи, Индија, живата во термометарот деновиве се искачи до рекордни 45°C.