Амбасадорот на Полска во Русија, Кшиштоф Крајевски, беше нападнат од „агресивна“ група демонстранти во Санкт Петербург, во инцидент кој полски функционер го опиша како „најсериозен од ваков вид во последниве години“, пренесува TVP World.
Крајевски, искусен дипломат кој ја извршува функцијата амбасадор од 2021 година, престојувал во Санкт Петербург за да се сретне со членовите на локалната полска заедница по повод Денот на независноста.
Инцидентот се случил додека амбасадорот се движел по Невски Проспект, најпознатиот булевар во градот, на пат кон служба во базиликата „Света Катерина Александриска“, придружуван од конзулот Јарослав Стричарски.
Според „Газета Виборча“, која се повикува на извори од полското Министерство за надворешни работи, толпа со антиполски и антиукраински транспаренти го опколила Крајевски и се обидела да го удри, но интервенцијата на Службата за државна заштита спречила ескалација. Оваа служба е задолжена за безбедност на високите полски функционери во странство.