Цените на нафтата на глобалните берзи денеска ја надминаа психолошката граница од 108 долари за барел. Трговците со зголемена внимателност ги следат најавите за нова рунда преговори меѓу Соединетите Американски Држави и Иран, исход кој директно би влијаел на снабдувањето со енергенси преку стратешкиот Ормуски теснец.
На лондонскиот пазар, барелот се тргуваше по цена од 108,50 долари, што претставува значителен раст од 3,17 долари во однос на затворањето на берзите на крајот од минатата недела. Сличен тренд е забележан и во САД, каде цената се зголеми за 2,28 долари и достигна ниво од 96,68 долари за барел.
Пазарите бурно реагираат на неизвесноста околу можните дипломатски контакти меѓу Вашингтон и Техеран. Иранскиот министер за надворешни работи, Абас Аракчи, во петокот отпатува во Исламабад на разговори со пакистански претставници за регионалната ситуација. Во меѓувреме, САД најавија испраќање своја делегација во пакистанската престолнина, но посетата беше експресно откажана откако Иран соопшти дека не е планирана никаква средба со американски преговарачи. Аракчи потоа ја продолжи својата турнеја во Мускат, а денеска пристигна и во Москва.
Според извори кои ги цитира агенцијата „Ројтерс“, Иран наводно предложил повеќефазен пристап во преговорите. Овој план би започнал со намалување на тензиите и гаранции за безбедност, додека прашањата поврзани со санкциите, ограничувањата за иранската нафта и блокадата на Ормускиот теснец би се разгледувале во подоцнежна фаза.
Економските аналитичари од ING посочуваат дека застојот во разговорите и стравувањата за намалена понуда се главните мотори за растот на цените. Глобалниот пазар во моментов се соочува со значително намалена понуда, што дополнително го засилува притисокот врз енергетскиот сектор.