Цената на нафтата надмина 95 долари за барел за првпат во последните шест недели, по новата ескалација на конфликтот меѓу САД и Иран.
Растот следува по новите американски напади врз ирански цели и заканите на Хутите за напади врз бродови во теснецот Баб ел Мандеб. Американскиот претседател Доналд Трамп најави дека нападите ќе бидат интензивирани доколку Иран продолжи со нападите врз бродови во Ормускиот Теснец.
Иран, од своја страна, возврати со напади врз енергетска инфраструктура и постројки за десалинизација во соседните земји од Заливот. Генералниот секретар на Обединетите нации, Антонио Гутереш, ги осуди овие напади како неприфатливи, нагласувајќи дека меѓународното право забранува напади врз цивилна инфраструктура, освен ако таа не се користи за воени цели.
Трамп, пак, порача дека САД ќе уништуваат мост или електрана за секој напад врз брод во Ормускиот Теснец. Според досегашните проценки, војната досега ги чинела САД 37,5 милијарди долари.
Цената на нафтата „брент“ во април достигна 126 долари за барел, пред да падне на 71 долар на почетокот на јули. Со повторното разгорување на конфликтот, цената повторно се искачи над 95 долари, што претставува најбрз раст од март.
Аналитичарите на „Голдман Сакс“ предупредуваат дека цената може да достигне и 120 долари за барел до крајот на годината доколку не се обнови извозот преку Ормускиот Теснец.
Директорот на Меѓународната агенција за енергија (ИЕА), Фатих Бирол, изјави дека пазарот засега се одржува благодарение на ослободувањето на 400 милиони барели од резервите на земјите членки на ИЕА, како и на алтернативните извозни рути на Саудиска Арабија и Обединетите Арапски Емирати.
Зголемениот извоз од Европа и САД, како и намалената побарувачка од Кина, помогнаа делумно да се ублажи кризата. Сепак, пазарот на рафинирани производи е сериозно погоден.
Бирол посочи дека производството на дизел и бензин е значително поограничено од снабдувањето со сурова нафта. Зголемениот извоз на природен гас од САД и Канада надоместил околу 70 отсто од загубите, но се очекуваат нови проблеми пред зимата, особено поради напорите на европските земји да ги наполнат складиштата.
Во меѓувреме, норвешката компанија „Еквинор“ пријави двојно зголемен профит од 11,5 милијарди долари во вториот квартал, благодарение на високите цени на енергенсите.