Министерството за правда на САД соопшти дека идентификувало повеќе од еден милион документи кои потенцијално се поврзани со случајот на Џефри Епштајн, а за нивна целосна обработка и објавување ќе бидат потребни уште неколку недели.
Во објава на социјалната мрежа X, Министерството наведе дека американскиот обвинител за Јужниот округ на Њујорк, заедно со Федералното истражно биро (ФБИ), го информирале одделот за постоењето на новиот обемен материјал.
Според соопштението, документите се доставени до Министерството за правда на преглед и објавување во согласност со Законот за транспарентност на Епштајн, важечките федерални закони и судските налози. Од Министерството додаваат дека тимови адвокати работат непрекинато на прегледот и на неопходните редакции, со цел заштита на жртвите, по што документите ќе бидат објавени што е можно побрзо.
Поради големиот обем на материјалот, процесот може да трае уште неколку недели, но Министерството уверува дека ќе постапува целосно согласно федералниот закон и директивата на претседателот Доналд Трамп за објавување на досиејата.
Ова соопштение следува по серијата објавени документи во рамки на новиот закон за транспарентност, усвоен од Конгресот минатиот месец. Иако крајниот рок за објавување беше во петокот, Министерството тој ден објави значителна количина материјали, по што следеа дополнителни објави во саботата и во вторникот, вклучувајќи и документи со значајни референци за претседателот Трамп.