Во Гостивар се очекуваат резултатите од анализите на надлежните институции кои треба да ја утврдат причината за појавата на зголемен број лица со стомачни тегоби.
Од синоќа преку владините служби започна дистрибуција на вода за пиење, а во акцијата се вклучија и поединци и компании. Според директорот на СОЗР, Ивица Томовски, на дневно ниво во Гостивар ќе се доставуваат 50 илјади литри пакувана вода.
Епидемиолозите вчера прогласија епидемија поради зголемениот број граѓани кои побарале медицинска помош со симптоми на гастроентероколит.
Од Министерството за здравство информираат дека здравствените институции продолжуваат со интензивно следење и истражување на состојбата.
Во периодот од 18 јули во 08:00 часот до 19 јули во 08:00 часот, во Општата болница во Гостивар биле регистрирани 204 прегледи на Инфективното одделение, при што три лица биле хоспитализирани. На Педијатриското одделение биле извршени 140 прегледи, од кои 105 нови и 35 контролни, додека во Ургентниот центар имало девет прегледи.
Од Министерството посочуваат дека кај најголемиот број пациенти клиничката слика е лесна, а бројот на хоспитализирани лица останува низок. Сепак, поради зголемениот број заболени во краток временски период, состојбата се третира како активен епидемиски настан и се спроведуваат епидемиолошки, лабораториски и превентивни активности.
По прогласувањето на епидемијата, Центарот за јавно здравје Гостивар врши теренски увиди, епидемиолошки анкети и собирање податоци од заболените. Досега се доставени околу 140 формални пријави за заразна болест, кои ги обработуваат епидемиолошките тимови на ЦЈЗ Тетово и Институтот за јавно здравје.
Во истрагата се вклучени и лабораториски испитувања на примероци од пациенти, анализи на водата и проценка на можните извори на зараза, како и надзор над водоснабдувањето и санитарно-хигиенските услови.
Надлежните институции координираат активности со Агенцијата за храна и ветеринарство, Државниот санитарен и здравствен инспекторат и локалните власти.
За денеска е најавена прес-конференција во владиниот прес-центар, на која се очекува да бидат презентирани резултатите од испитувањата на водата од градскиот водовод и дополнителни информации за состојбата во Гостивар.