УХМР ги измери температурите во 11 часот низ Македонија. Најниска температура е измерена на Попова Шапка и тоа 21 степени во 11 часот.
Најтопло денеска е во Гевгелија со 31 степени. Во Скопје во 11 часот се измерени 28 степени.
Управата за хидрометеоролошки работи (УХМР) за денеска прогнозира сончево и многу топло време со мала до умерена локална облачност. Во попладневните и вечерните часови на повеќе места се очекува локална нестабилност, проследена со пороен дожд, грмежи, засилен ветер и услови за изолирано невреме со појава на град. Ќе дува слаб до умерен северозападен ветер, кој повремено на одделни места ќе биде засилен.
Утринските температури ќе се движат од 12 до 16 степени, а дневните ќе достигнат од 32 до 37 степени Целзиусови.
Во Скопје се очекува претежно сончево и многу топло време со мала до умерена облачност. Во попладневните часови во делови од котлината ќе има услови за нестабилност со пороен дожд, грмежи и засилен ветер. Температурата ќе се движи од 16 степени наутро до околу 35 степени во текот на денот.
Според прогнозата на синоптичарите, до петок времето ќе остане променливо облачно и нестабилно под влијание на серија влажни воздушни маси. На повеќе места ќе има пороен дожд и грмежи, а локално се очекуваат краткотрајни невремиња со силен ветер и изолирана појава на град. Во петок се прогнозираат пообилни врнежи од дожд, додека со продор на постудена воздушна маса од север ќе следува и значителен пад на дневните температури.