Собраниските активности денеска продолжуваат со заседанија на четири клучни тела. Пратениците ќе дебатираат за серија законски измени кои опфаќаат области од економијата, социјалната политика и финансиите.
Најголем дел од вниманието е насочено кон Комисијата за финансирање и буџет, каде на дневен ред е задолжувањето кај Банката за развој при Советот на Европа. Станува збор за дополнително финансирање на проектот за изградба на училишни фискултурни сали, како и разгледување на Финансискиот план на Агенцијата за супервизија на осигурување за 2026 година.
Во меѓувреме, Комисијата за социјална политика ќе ги разгледува измените во Законот за регистар на задолжително социјално осигурување и реформите во системот за проценка на лица со попреченост.
Паралелно, Комисијата за економски прашања ќе го разгледува предлогот за престанување на важењето на Законот за вонсудско спогодување, тема која ќе биде предмет на дискусија и на Законодавно-правната комисија, која треба да даде зелено светло за сите предложени законски акти во второ читање.