Собраниската Комисија за финансирање и буџет денеска ќе го продолжи вториот ден од амандманската расправа по Предлог-ребалансот на Буџетот.
Во текот на вчерашната седница беа разгледани повеќе амандмани со кои се предлагаа дополнителни средства за Министерството за односи со заедниците, повисоки плати за вработените во Министерството за одбрана и Армијата, како и зголемени блок-дотации за општините за поддршка на противпожарните единици. Дел од предлозите се однесуваа и на обезбедување средства за изградба на објекти на Армијата.
За ребалансот се поднесени вкупно 224 амандмани – 87 од ДУИ, 78 од СДСМ, 51 од Левица и осум од коалицијата „Вреди“.
Со предложениот ребаланс, вкупните буџетски приходи се проектирани на 379,2 милијарди денари, што е за околу 4,2 милијарди денари или 1,1 процент повеќе во споредба со првичниот Буџет за 2026 година. Расходите се планирани на 425,2 милијарди денари, а за капитални инвестиции се предвидени речиси 46 милијарди денари, што претставува зголемување од 14,5 проценти.
Проекциите остануваат економски раст од 3,5 проценти, инфлација од 4,5 проценти и буџетски дефицит од 4,1 процент од бруто-домашниот производ.
Министерката за финансии Гордана Димитриеска-Кочоска претходно изјави дека ребалансот не е последица на намалени буџетски приходи или проблеми со ликвидноста, туку е направен за усогласување на буџетските проекции со актуелните економски движења и глобалните предизвици.