Секторот за сообраќајни работи при Министерството за внатрешни работи во периодот од мај до август 2026 година спроведе засилени акциски контроли на територијата на целата држава, со фокус на прекршоците направени од возачи на електрични тротинети, велосипеди, велосипеди со помошен мотор, мопеди, мотоцикли, трицикли и четирицикли.
Во текот на контролите биле регистрирани 10.411 сообраќајни прекршоци. Од нив, 1.571 се однесуваат на електрични тротинети, 34 на велосипеди, додека најголемиот дел, односно 8.806 прекршоци, се констатирани кај возачи на мопеди, мотоцикли и трицикли.
Најчестиот прекршок е некористењето заштитен шлем – кацига, за што се евидентирани 7.303 случаи. Полицијата констатирала и 718 случаи на управување по несоодветна површина, 401 прекршок поврзан со нерегистрирани возила и/или возила без полиса за осигурување, како и 322 случаи на некористење рефлектирачки елек.
Во рамки на акциите биле евидентирани и 81 прекршок за управување од лица помлади од 18 години, 45 случаи на управување под дејство на алкохол, како и дополнителни 1.541 прекршок од друг вид.
Покрај прекршоците, полициските службеници откриле и 619 кривични дела. Од нив, 604 се однесуваат на управување возило без возачка дозвола, 14 на управување под дејство на алкохол, а едно кривично дело е поврзано со управување во забранет правец.
Како дел од преземените мерки, привремено се одземени 423 превозни средства – 20 електрични тротинети и 403 мопеди, мотоцикли и трицикли.
Од МВР информираат дека засилените сообраќајни контроли продолжуваат, со посебен фокус на прекршоците и ризичните однесувања кои директно ја загрозуваат безбедноста на сите учесници во сообраќајот. Целта, како што посочуваат од Министерството, е навремено откривање и санкционирање на прекршувањата, спречување на сообраќајни незгоди и заштита на човечките животи.
Од МВР упатуваат апел до возачите доследно да ги почитуваат сообраќајните правила, да ја користат задолжителната заштитна опрема и никогаш да не управуваат под дејство на алкохол или без исполнување на законските услови.
Особено се апелира на зголемена внимателност и одговорност кон пешаците и останатите учесници во сообраќајот.
Побезбедни патишта, посигурни животи. Безбедноста во сообраќајот не е случајност – таа е одлука.