Македонија останува цврсто и непоколебливо посветена на својот европски пат, без оглед на сите предизвици и долготрајниот застој во процесот на интеграција. Ова го истакна министерот за надворешни работи и надворешна трговија, Тимчо Муцунски, во интервјуто за емисијата „12 минути со“ на престижниот медиум „Еуроњуз“, потенцирајќи дека државата не ја гради својата проевропска позиција само преку политички изјави, туку преку конкретни реформи и вредности кои секојдневно се спроведуваат во општеството.
Запрашан дали постојаното одложување на членството во Европската Унија (ЕУ) ризикува да ја оттурне земјата кон алтернативни центри на моќ како Русија или Кина, шефот на дипломатијата предупреди на опасностите од геополитичкиот вакуум. Тој посочи дека целиот регион се соочува со сериозни малигни влијанија, нагласувајќи дека хибридните закани секогаш напредуваат и се засилуваат на оние места каде што расте фрустрацијата кај граѓаните и каде што се губи довербата во институциите и во меѓународните партнери.
„Иако заканата постои, ние покажавме дека сме отпорни не само на зборови, туку и во реалната пракса. Членството во Европската Унија останува наш клучен надворешнополитички приоритет и најдобар можен механизам за обезбедување на долгорочната стабилност, безбедност и економски развој на целиот регион“, се наведува во соопштението од ресорното Министерство во врска со интервјуто на Муцунски.
Во рамки на разговорот, македонскиот министер се осврна и на глобалната безбедносна архитектура, улогата на НАТО и важноста на евроатлантската координација. Во тој контекст, тој упати директно признание до американскиот претседател Доналд Трамп и државниот секретар на САД, Марко Рубио, оценувајќи дека благодарение на нивниот ангажман и целокупниот надворешнополитички апарат на Соединетите Американски Држави, Алијансата денес е посилна од кога било досега.
Според Муцунски, силата и новата динамика во НАТО станале неспорни по минатогодишниот Самит во Хаг, каде што земјите-членки се обврзаа на драстично зголемување на трошоците за одбрана до 5 проценти од бруто-домашниот производ (БДП) до 2035 година. Како што заклучи шефот на дипломатијата, оваа амбициозна, но неопходна агенда е директен одговор на тековната руска агресија врз Украина, како и на безбедносните кризи во Индо-Пацификот и на Блискиот Исток, за кои претседателот Трамп практично му дал вистински „повик за будење“ на целиот пакт.