Министерот за надворешни работи и надворешна трговија, Тимчо Муцунски, ја заврши официјалната посета на Катар со средби со претставници на две значајни компании – Qatar Airways и Barzan Holdings.
На разговорите со раководството на Qatar Airways, една од водечките светски авиокомпании, биле презентирани можностите за инвестирање во земјава, како и потенцијалите за воспоставување директна авионска линија меѓу Скопје и Доха.
Според Министерството за надворешни работи и надворешна трговија, соговорниците оцениле дека подобрата воздушна поврзаност би придонела за развој на туризмот, зголемување на трговската размена, олеснување на деловните контакти и поголема мобилност на граѓаните.
На средбата со Barzan Holdings се разговарало за можности за соработка во одбранбената индустрија и безбедносните технологии, како и за размена на искуства во развојот и модернизацијата на одбранбените капацитети.
Посетата на Муцунски на Катар е дел од активностите насочени кон привлекување странски инвестиции, унапредување на извозот и продлабочување на економската и трговската соработка меѓу двете земји.