Министерот за надворешни работи и надворешна трговија, Тимчо Муцунски, денеска остварил средба со вршителката на должноста амбасадорка на САД, Никол Варнес.
Тој во објава на Фејсбук информира дека на средбата изразиле задоволство од развојот на билатералните односи и стратешкото партнерство меѓу двете држави, како и подготвеност за натамошно продлабочување на соработката во повеќе области од заемен интерес.
„Разменивме мислења за актуелните меѓународни и регионални случувања, состојбите во рамки на НАТО и актуелните безбедносни предизвици, при што го потврдивме значењето на американско-македонското стратешко партнерство и сојузништвото во Алијансата како важни фактори за стабилноста и безбедноста“, наведува Муцунски.
Во разговорите станало збор и за реформските процеси во државата, вклучително и за реформите во правосудството, дигитализацијата, борбата против корупцијата и организираниот криминал, како и за реализацијата на инфраструктурните проекти.
„Ја потврдивме заедничката определба за натамошно унапредување на политичкиот дијалог и билатералните односи, продолжување на активностите во рамки на Стратешкиот дијалог, како и зајакнување на партнерството во рамките на НАТО Алијансата“, додава шефот на дипломатијата.