Прашањата за заштита на човековите права и системското непочитување на правата на Македонците во Бугарија остануваат во фокусот на дипломатските активности на македонското Министерство за надворешни работи. Како што соопшти денеска шефот на дипломатијата, Тимчо Муцунски, државата преку своето делување во Советот на Европа постојано го покренува ова прашање и врши притисок за доследно почитување на меѓународните стандарди.
Министерот посочи дека темата за човековите права зазема централно место во работата на оваа престижна европска институција, со која Македонија се подготвува официјално да претседава почнувајќи од 2028 година.
Во однос на извршувањето на одлуките од Стразбур, Муцунски потврди дека македонските институции будно ги следат сите процеси поврзани со имплементацијата на пресудите донесени во корист на македонските здруженија во Бугарија.
За време на денешната прес-конференција, министерот Муцунски даде детално појаснување за правната позиција на земјата и активностите во Комитетот на министри:
„Ние сме прилично активна земја по повеќе предмети, но меѓу другото и предметите поврзани со ОМО Илинден-Пирин и со други невладини организации на територија на Бугарија. За жал, поради долгогодишна грешка од пред 15, 20, па и повеќе години, ние не сме странка во тие постапки, иако сме можеле да бидеме, но тоа било погрешна одлука донесена во тој период. Меѓутоа, како земја членка на таа организација, имаме право да даваме свој импут и свои гледишта и тоа активно го правиме во Комитетот на министри, каде што инсистираме на доследно спроведување и целосно имплементирање и спроведување на пресудите на Европскиот суд за човекови права, бидејќи тоа го сметаме како значајно цивилизациско достигнување во денешна Европа, рече Муцински во одговор на новинарско прашање на денешната прес-конференција.“
Подготовки за претседавањето со Советот на Европа во 2028 година
Осврнувајќи се на идните дипломатски обврски, шефот на дипломатијата информираше дека државата веќе ги започнува оперативните подготовки за преземање на претседавачката функција со Комитетот на министри при Советот на Европа.
Како што појасни тој, наредниот период од година и половина ќе се искористи за координација на приоритетите со претходните и идното претседателство.
„Ние веќе влегуваме во процес на подготовка за тоа претседавање. Презентираме наши приоритети, разговараме и со земјите коишто биле претседавачи пред нас или ќе бидат по нас, за колку што може повеќе да имаме и координирани приоритети во рамките на тоа претседавање. Така што тоа е еден процес за којшто ние од мултилатерална гледна точка и како институција, но и како држава, постојано се подготвуваме, рече Муцунски.“