Министерот за надворешни работи и надворешна трговија, Тимчо Муцунски, денеска порача дека државата во моментов не е подготвена да преземе чекори кон уставни измени. На заедничката прес-конференција со генералниот секретар на Советот на Европа, Ален Берсе, Муцунски истакна дека постои сериозен недостиг на доверба во однос на меѓународните испораки кон земјава.
„Во однос на билатералните односи со Бугарија, сакам да бидам кристално јасен. Во овој контекст нашата држава не е подготвена за уставни измени. Има недостиг на доверба и недостиг на кредибилитет во однос на испораката кон нас како држава, така што во овој момент услови за уставни измени нема и Владата не е подготвена да преземе каков било чекор кон уставни измени“, изјави Муцунски.
Министерот потенцираше дека земјата останува посветена на реформската агенда и европските вредности, без оглед на моменталните препреки. Според него, фокусот останува на заедничката надворешна и безбедносна политика.
Во однос на политичката ситуација во Софија, Муцунски нагласи дека Македонија е секогаш отворена за дијалог, но дека досега таква волја кај соседот недостигала.
„Она што можам да ви го кажам е дека ние секогаш сме биле подготвени за дијалог и сега сме подготвени за тоа. Недостиг за волја за таков дијалог имаше од страна на соседна Бугарија при постоењето на една претходна политичка влада. Јас се надевам дека има свест во Софија оти европската перспектива за нашата држава е значајна за целиот регион“, заклучи министерот.