Министерот за надворешни работи и надворешна трговија, Тимчо Муцунски, денеска во Скопје се сретна со висока делегација од Европската служба за надворешно дејствување (ЕЕАС). Фокусот на разговорите беше ставен на Партнерството за безбедност и одбрана меѓу Европската Унија и Македонија, потпишано во 2024 година.
На средбата беше поздравен редовниот политички дијалог, а како значаен чекор беше оценет и вториот состанок одржан минатиот месец во Брисел. Според соопштението од МНРиНТ, овие средби придонесуваат за преточување на политичките заложби во конкретни приоритети за соработка.
Соговорниците разменија мислења и за Европскиот мировен инструмент (ЕПФ). Беше нагласено дека се очекува зголемување на поддршката за земјите од регионот преку Стратешките насоки за 2027 година.
„Се очекува зголемување на поддршката за земјите од регионот, како и развој на проекти кои, покрај билатералната компонента, ќе имаат и регионална димензија“, беше истакнато на средбата.
Претставниците на ЕЕАС информираа и за можни поголеми регионални проекти кои би се финансирале од европскиот буџет за 2027 година. Министерот Муцунски ја потврди силната ориентација на земјата кон евроинтеграциите.
„Македонија останува кредибилен и конструктивен партнер на Европската Унија во областа на надворешната и безбедносната политика“, порача Муцунски.