Министерот за надворешни работи и надворешна трговија, Тимчо Муцунски, денеска заминува во дводневна работна посета на Вашингтон, каде ќе учествува на меѓународна министерска конференција посветена на борбата против политичкиот тероризам. Настанот се одржува на покана на американскиот државен секретар Марко Рубио.
Конференцијата ќе собере претставници на повеќе од 60 држави, кои ќе разговараат за зајакнување на меѓународната соработка во справувањето со тероризмот, спречувањето на радикализацијата и одговорот на новите безбедносни предизвици.
Во своето обраќање, Муцунски ќе ги претстави активностите што земјава ги спроведува во превенцијата на насилниот екстремизам и радикализацијата, како и мерките за унапредување на законската и институционалната рамка во оваа област.
За време на престојот во Вашингтон, предвидени се и билатерални средби со американски претставници. Според најавите, министерот ќе се сретне со Даниел Џ. Лотон, заменик-помошник државен секретар на САД задолжен за Западна, Централна и Јужна Европа, при што ќе се разговара за актуелните безбедносни и билатерални прашања.
Од Министерството за надворешни работи и надворешна трговија оценуваат дека конференцијата претставува можност за продлабочување на партнерството со Соединетите Американски Држави и со останатите меѓународни сојузници во областа на безбедноста.