Министерот за надворешни работи и надворешна трговија, Тимчо Муцунски, попладнево учествуваше на министерска тркалезна маса во Њујорк, посветена на темата: „Промоција и заштита на човековите права преку реформата на ОН 80“. Настанот беше организиран по покана на министрите за надворешни работи на Холандија и Чиле.
Во своето обраќање, Муцунски потенцираше дека годината во која се одбележуваат 80 години од основањето на Обединетите нации е историска можност не само за славење на досегашните достигнувања, туку и за соочување со новите глобални предизвици што директно ги засегаат човековите права.
„Иако организацијата има значаен придонес, светот и понатаму се соочува со сериозни закани како што се вооружени конфликти, климатски промени, технолошка трансформација, дезинформации, растечка нееднаквост и миграции“, истакна Муцунски.
Тој додаде дека Северна Македонија, како членка на Советот за човекови права за периодот 2025–2027, останува силно посветена на поддршка на иницијативите што имаат цел да го унапредат делувањето на Обединетите нации преку независност, одговорност, ефикасност и ефективност.
Муцунски ја нагласи важноста од вистински дијалог меѓу земјите-членки и соработка заснована на почитување на човековото достоинство и основните права како централен елемент на сите идни реформи на ОН.