Министерот за надворешни работи и надворешна трговија и член на Извршниот комитет на ВМРО-ДПМНЕ, Тимчо Муцунски, во телевизиско гостување на „Сител“ зборуваше за ширењето дезинформации и, како што оцени, лажни вести од страна на СДСМ.
Муцунски оцени дека опозициската партија следи „лоша траекторија“, обвинувајќи ја дека во изминатите години ја нарушила довербата на граѓаните во институциите, а сега преку дезинформации повторно создава паника.
Тој порача дека мора да има одговорност за ширење лажни вести и предизвикување паника, правејќи разлика меѓу политичката критика и намерното ширење невистини.
Според Муцунски, политичарите треба да бараат решенија кога се на власт, а кога се во опозиција да упатуваат конструктивна и аргументирана критика. Тој истакна дека за клучните прашања е потребен политички консензус, но и функционално правосудство кое ќе постапува кога се нарушува довербата во институциите.
Во врска со тврдењата за наводни тајни разговори поврзани со надворешната политика, Муцунски ги отфрли ваквите информации, нагласувајќи дека не водел разговори „под радарот“.
Зборувајќи за европските интеграции, министерот оцени дека решението прифатено од претходната Влада е неприфатливо и може да создаде дополнителни проблеми во процесот на пристапување кон ЕУ.
Тој порача дека Владата ќе продолжи да бара решение за напредок кон Европската Унија, но притоа да ги заштити државните и националните интереси.
„На нас е да бараме решение – решение што ќе биде достоинствено и одржливо“, порача Муцунски.