Министерот за надворешни работи и надворешна трговија Тимчо Муцунски од Бледскиот стратешки форум порача дека членството во Европската Унија и НАТО е клучно за безбедноста и стабилноста на регионот.
Муцунски оцени дека Европа има можност да го врати својот кредибилитет доколку на процесот на проширување гледа низ стратешка, а не само низ бирократска призма. Според него, за проширувањето е потребна политичка волја, каква што во минатото била поизразена.
„Сега е вистинското време таа политичка волја повторно да се воспостави“, порача Муцунски на министерската сесија посветена на геополитичките промени, безбедноста, коридорите и проширувањето.
Тој нагласи и дека европската интеграција треба да биде процес кој ќе ги трансформира институциите, а не идентитетите, а напредокот на земјите кандидати да се оценува според заслугите и усогласеноста со надворешната и безбедносната политика на ЕУ.
Словенечкиот министер за надворешни работи Тоне Кајзер, исто така, повика ЕУ да биде попрагматична и да го забрза проширувањето, предупредувајќи дека одложувањето може дополнително да ја ослаби позицијата на Унијата на Западен Балкан.