Полицијата во Одивелас, Португалија, ги истражува сите околности околу сообраќајната несреќа во која живот го загуби 49-годишна државјанка на Бразил, откако била пронајдена во несвест и без облека во превртен автомобил.
И покрај обидите за реанимација, жената починала на местото на настанот, додека 26-годишниот возач го напуштил местото на сообраќајката.
Сообраќајната несреќа се случила во раните утрински часови на мостот Понте да Бика. Итните служби биле повикани во 3:05 часот наутро од вработени на блиската бензинска пумпа кои биле сведоци на превртувањето на возилото, објави португалскиот весник „Обсервадор“.
Според официјалниот полициски извештај, жената претходно го напуштила својот дом во населбата Рамада, со образложение дека оди да купи цигари. Нејзиниот сопруг го пријавил нејзиното исчезнување во полицијата во Лурес само неколку минути пред да се случи сообраќајката.
Сведоци за полицијата изјавиле дека маж без маица и со полесни повреди излегол од превртеното возило и побегнал пеш. Подоцна било утврдено дека станува збор за 26-годишен Португалец, кој е и сопственик на автомобилот.
Кога пристигнала екипата на Итната медицинска помош, жената била во срцев и респираторен застој. По неуспешните обиди за реанимација, медицинскиот тим констатирал смрт.
Осомничениот возач подоцна сам се предал во полициската станица во Одивелас, во придружба на својот адвокат, каде што му било наложено да се јави во сообраќајната служба, но според информациите на „Обсервадор“, тоа дотогаш не го сторил.
Истражителите направиле детална дактилоскопска анализа и преглед на возилото за да се соберат сите отпечатоци и индиции кои треба да ги утврдат причините за превртувањето.
Весникот „Кореио да Мања“ пренесува изјави од сведоци кои укажуваат на можноста патниците да имале сексуален однос за време на возењето, но оваа информација сè уште не е официјално потврдена од истрагата. Положбата во која е пронајдено телото сугерира дека починатата жена не носела сигурносен појас.