Палестинската управа ја извести Франција дека парламентарните избори на палестинските територии, кои првично беа планирани за 28 ноември, најверојатно ќе бидат одложени поради влошените услови на окупираните територии. Според писмото во кое увид имаше агенцијата „Ројтерс“ (а го пренесе БТА), на претседателот Махмуд Абас му е советувано гласањето да се помести за првата половина на септември 2027 година.
Потпретседателот на Палестинската управа, Хусеин ал Шеик, во писмото испратено до францускиот министер за надворешни работи Жан-Ноел Баро, нагласи дека политичките, безбедносните и економските услови врз основа на кои беа распишани изборите не се исполнети.
„Одржувањето на изборите во сегашните околности наидува на суштински пречки за обезбедување широко учество, слобода на учество и гаранции за веродостојноста на изборниот процес“, се наведува во писмото.
Во документот се појаснува дека палестинските власти очекувале подобрување на условите преку спроведување на мировната иницијатива на американскиот претседател Доналд Трамп и соодветната резолуција на Советот за безбедност на ОН. Овие мерки требаше да вклучат распоредување меѓународни сили и палестинска полиција во Газа, разоружување на Хамас и повлекување на израелските сили од Појасот Газа. Исто така, се очекуваше САД да спречат анексија на дополнителни територии на Западниот Брег и во Источен Ерусалим, да го ограничат насилството од еврејските доселеници и да одмрзнат речиси седум милијарди долари од палестинските средства кои се блокирани од Израел.
„Овие чекори, договори и ветувања не беа реализирани. Напротив, условите на сите палестински територии се влошија“, напиша Ал Шеик до Баро.
Врз основа на овие проценки, препораката до претседателот Абас е со указ да го одложи гласањето за септември 2027 година и во меѓувреме да продолжи дијалогот. Дел од претставниците на движењето Фатах побараа поширок дијалог со Хамас и другите фракции за заедничка визија пред изборите, додека други укажуваат на практични пречки, како што е внесувањето гласачки кутии, документација и специјално мастило во Појасот Газа.
Писмото е испратено до Франција, која ја призна Палестинската Држава во септември минатата година, кога Париз инсистираше на одржување избори, за што Абас писмено се обврза пред францускиот претседател Емануел Макрон и саудискиот престолонаследник Мохамед бин Салман.
Портпаролот на француското Министерство за надворешни работи, Паскал Конфавро, изјави дека одржувањето избори на палестинските територии останува од суштинско значење и ја поздрави мисијата на Европската Унија за набљудување на изборите.