Руското Министерство за надворешни работи упати остри критики кон последната резолуција на Генералното собрание на ОН, оценувајќи ја како пристрасна и директно насочена против интересите на Русија.
Според Москва, седницата одржана на 24 февруари по повод четиригодишнината од почетокот на воената операција, била иницирана од Киев и неговите европски партнери со цел да се протурка уште еден антируски документ.
„Лукав“ наслов за намалена поддршка
Руското министерство смета дека новиот пристап во именувањето на документот е обид да се прикрие неговата вистинска намена.
„Овој пат, документот е лукаво насловен како ‘Поддршка за траен мир во Украина’ и е формулиран поконцизно од претходните резолуции на 11-та вонредна седница“, се вели во официјалното соопштение.
Од Москва додаваат дека ваквиот формат е резултат на соочувањето со „тактичка стапица“, бидејќи нивото на поддршка за антируските иницијативи во ОН е во постојан пад. Според нивната проценка, меѓународната заедница станува сè порезервирана кон ваквите предлози кои веќе им се „премногу познати“ на повеќето земји членки.