Министерството за образование и наука го распиша Конкурсот за доделување на стипендии „Борис Трајковски“ за студии од втор циклус во рамки на Паневропската извршна МБА-програма на Универзитетот Јорк за академската 2026/2027 година.
Конкурсот предвидува 20 стипендии за вонредни двегодишни студии со двојна диплома од Универзитетот Јорк и Универзитетот во Стразбур, кои се реализираат на Европскиот кампус на Универзитетот Јорк во Солун.
Програмата е наменета за стручни кадри и бизнис менаџери од приватниот и јавниот сектор и се реализира во шест насоки: општ менаџмент, маркетинг, финансии, менаџмент во логистика, менаџмент во здравство и менаџмент на човечки ресурси.
Од Европскиот кампус на Универзитетот Јорк соопштија дека со стипендиите „Борис Трајковски“ повеќе од две децении им се овозможува на македонските професионалци пристап до врвно европско образование без напуштање на државата и прекин на кариерата, со можност за стекнување диплома од два европски универзитета.
Наставата се одвива за време на викенди во Солун, дополнета со студиски престои во Обединетото Кралство и Франција. По завршувањето, студентите добиваат две дипломи за извршни мастер студии по деловна администрација.
Паневропската МБА-програма е дел од меѓународно акредитирана мрежа на бизнис-образовни институции и нуди високо рангирано образование со глобално признати стандарди.
Крајниот рок за пријавување за стипендиите „Борис Трајковски“ е 31 јули 2026 година.