Годишниот извештај на Агенцијата за заштита на правото на слободен пристап до информациите од јавен карактер за 2025 година денеска ќе биде разгледан од собраниската Комисија за политички систем и односи меѓу заедниците.
Според извештајот, објавен на веб-страницата на Собранието, во текот на минатата година до Агенцијата биле поднесени вкупно 626 жалби, поради молчење на првостепените органи – иматели на информации, или поради нивни одговори дадени во управни и реални акти.
Од вкупниот број жалби, 438 или 69,96 отсто се однесувале на непостапување на имателите на информации по барањата за пристап до информации од јавен карактер.
Во извештајот се оценува дека „молкот на управата“ и натаму останува сериозен проблем, и покрај заложбите на Агенцијата. Како една од причините се посочува недоволната свест и разбирање, особено кај дел од раководните структури во институциите на централно и локално ниво, за значењето на правото на слободен пристап до информациите од јавен карактер.
Агенцијата заклучува дека е потребно да го засили активниот ангажман со административните службеници и раководните структури, со цел да се влијае врз промената на бирократскиот менталитет и постепено да се намали, а во иднина и целосно да се елиминира „молкот на управата“.