Заврши изборната кампања, а од полноќ на сила е изборниот молк пред утрешното гласање за вториот круг од Локалните избори. Право на глас во овој круг имаат 1.013.375 граѓани, кои ќе гласаат на избирачки места отворени од 7:00 до 19:00 часот.
Се гласа за градоначалници во 32 општини и за Градот Скопје.
Во скопските општини Центар, Аеродром и Карпош, гласачите ќе добијат две ливчиња – за градоначалник на Скопје и за градоначалник на нивната општина. Во Шуто Оризари, на три гласачки места, освен за градоначалник ќе има и прегласување за советничката листа. Во сите останати општини се гласа само за градоначалник.
Идентификацијата на гласачите ќе се врши со уреди за биометриска идентификација (фингерпринт), кои првпат беа воведени на изборите во 2021 година, како и со важечка лична карта или пасош.
Денеска гласаат болните, изнемоштените, лицата во домашен притвор и затворениците. За ова гласање се пријавени 4.826 болни и изнемоштени лица.
Изборниот молк, кој трае до 19:00 часот утре, забранува емитување какви било информации, фотографии или изјави поврзани со кандидатите, како и секакво известување кое може да влијае врз одлуката на избирачите.
ДИК ќе ги објавува првичните резултати сукцесивно по електронски пат, а резултатите врз основа на записниците од општинските комисии треба да бидат објавени во рок од 12 часа по завршувањето на гласањето.
Потсетуваме, во првиот круг беа избрани 44 градоначалници. Во четири општини (Гостивар, Врапчиште, Центар Жупа и Маврово) изборот за градоначалник не успеа поради недоволен цензус и таму постапката ќе се повтори.