Основното јавно обвинителство во Свети Николе експресно поднесе обвинение против 21-годишен маж, откако на виделина излегоа застрашувачки детали за семејно насилство извршено врз неговата бремена девојка.
Според информациите од Обвинителството, инцидентот се случувал на 19 и 20 февруари во нивната семејна куќа. Насилникот прво вербално ја навредувал својата партнерка со која живеел во заедница, по што започнал брутално да ја удира со тупаници. Откако несреќната жена се онесвестила од силината на ударите, тој ја одвлекол во бањата и ја освестил со ладна вода, само за да продолжи со изживувањето – влечејќи ја за коса и задавајќи ѝ нови удари по главата и телото.
Кога жртвата, која се здобила со повеќе телесни повреди, се обидела да побегне, обвинетиот ѝ го одзел мобилниот телефон и ја заклучил во спалната соба. Таму ја држел против нејзина волја цели 15 часа.
Поради тежината на делата – телесна повреда при семејно насилство и противправно лишување од слобода, надлежниот јавен обвинител до судот достави и предлог за одредување мерка притвор. Од ОЈО додаваат дека во тек се проверки и за други можни злоупотреби кои насилникот ги вршел врз истата жртва, а кои произлегле од нејзиниот исказ даден пред истражните органи.