Министерството за надворешни работи и надворешна трговија информираше дека вкупно 11 македонски државјани досега официјално побарале помош за евакуација од Израел. И покрај барањата, реализацијата на евакуацијата во моментов е оневозможена поради безбедносната состојба во регионот.
„Согласно последните информации, воздушниот простор останува затворен најмалку до понеделник. По неговото повторно отворање ќе бидат разгледани можностите и моделите за организирање евентуална евакуација, во согласност со околностите и безбедносната состојба“, соопштија од МНР.
Од таму упатија апел до сите наши граѓани кои се наоѓаат во Израел строго да ги почитуваат насоките од локалните служби.
„Во оваа фаза, препораката до нашите државјани е внимателно да ги следат официјалните известувања на израелските власти, да постапуваат согласно безбедносните протоколи и да останат во засолништа кога тоа е наложено“, стои во препораката.
Додека во Израел бројката на барања расте, во дипломатско-конзуларните претставништва во Доха и Абу Даби засега нема евидентирано македонски државјани кои побарале итна евакуација. МНР нагласува дека амбасадите во Тел Авив, Доха и Абу Даби се во постојан контакт со граѓаните и се целосно на располагање за потребна помош.