ВМРО-ДПМНЕ обвинува дека СДСМ и лидерот на партијата, Венко Филипче, ширеле паника во јавноста околу случајот со „Алта банка“, претставувајќи се како загрижени за граѓаните и стабилноста на банкарскиот сектор, додека самите не реагирале навреме кога биле на власт.
Во партиското соопштение се наведува дека и покрај, како што велат, итноста што ја наметнувале СДСМ и Филипче во јавноста, првата надзорна седница била свикана дури по 10 дена, а втората две недели по првата.
Од ВМРО-ДПМНЕ оценуваат дека тоа ја доведува во прашање сериозноста на нивните реакции и обвинуваат дека опозицијата правела политичка врева без соодветна одговорност.
Од владејачката партија дополнително отвораат прашања за постапките од 2023 година, кога СДСМ и ДУИ биле на власт. Според ВМРО-ДПМНЕ, тогашни функционери учествувале во постапки поврзани со вклучувањето на Државното правобранителство во деловни односи со „Алта банка“.
Од партијата прашуваат дали во тој период биле направени проверки, кој ја разгледувал документацијата и кој дал согласност, како и зошто евентуалните сомнежи не биле јавно посочени тогаш.
ВМРО-ДПМНЕ смета дека СДСМ и Филипче треба да дадат одговори за постапките од времето кога ја предводеле власта, наместо, како што наведуваат, денес да зборуваат за одговорност, а претходно да молчат.
Ставовите и обвинувањата се дел од партиското соопштение на ВМРО-ДПМНЕ.

