Началникот на Генералштабот на Армијата, генерал-мајор Сашко Лафчиски, ќе престојува во Тирана, каде што ќе учествува на редовниот годишен состанок на началниците на генералштабовите на земјите членки на Иницијативата за соработка во одбраната (DECI).
Состанокот е посветен на регионалната безбедност и унапредувањето на одбранбената соработка, а покрај воените претставници од земјите членки, ќе присуствуваат и високи претставници на НАТО и Европската Унија.
Меѓу учесниците се најавени заменик-командантот на Здружената команда на НАТО во Неапол, командантот на мултинационалните копнени сили, како и командантите на мисиите КФОР и ЕУФОР.
Во фокусот на разговорите ќе бидат актуелните безбедносни предизвици во регионот, соработката во рамки на DECI и НАТО, како и можностите за продлабочување на партнерството преку заеднички обуки и активности.
Предвидено е генерал-мајор Лафчиски да се обрати на работните сесии, при што ќе ја истакне посветеноста на државата кон колективната безбедност и придонесот на Армијата во регионалните и меѓународните безбедносни иницијативи.
На завршницата на состанокот, началниците на генералштабовите треба да усвојат заедничка изјава за соработка и да ги утврдат следните чекори за реализација на заедничките проекти во рамки на иницијативата DECI.
Од Генералштабот на Армијата информираат дека учеството на состанокот е дел од континуираните активности за зајакнување на регионалната одбранбена соработка.

