Министерката за образование и наука Весна Јаневска денеска ќе присуствува на настан во рамки на програмата за одбележување на Европската ноќ на истражувачите 2026.
Настанот ќе се одржи во 12 часот на Машинскиот факултет во Скопје, а е поддржан преку акциите „Марија Склодовска-Кири“ од програмата „Хоризонт Европа“, информира Министерството за образование и наука.
Од МОН посочуваат дека Северна Македонија се приклучува кон одбележувањето на Европската ноќ на истражувачите на иницијатива на Универзитетот „Св. Кирил и Методиј“ – Скопје, Универзитетот „Гоце Делчев“ – Штип, Универзитетот „Св. Климент Охридски“ – Битола и Македонската академија на науките и уметностите, со поддршка од Министерството за образование и наука.
Во рамки на настанот ќе бидат организирани повеќе работилници, лабораториски посети, презентации и изложби на студентски и научноистражувачки проекти, како и други интерактивни активности.
Европската ноќ на истражувачите има цел да ја доближи науката и истражувачката работа до јавноста, особено до младите, преку непосредно запознавање со научните и истражувачките активности.