Хируршките сали во Клиничкиот центар се соочуваат со технички дефект поради кој се откажуваат однапред закажаните и помалку итни операции, алармираше денеска Рената Младеновска, членка на Извршниот одбор на СДСМ. Таа обвини дека здравствениот систем е доведен до колапс.
Според нејзините информации, во моментов се откажуваат оперативни зафати на неколку клучни клиники.
„Откажани се операции на Клиниката за трауматологија, ортопедски болести, анестезија, реанимација, интензивно лекување и ургентен центар. Ова е уште еден доказ за целосната негрижа и неспособност на оваа Влада и на Министерството за здравство, да обезбедат елементарни услови за функционирање на здравствениот систем“, изјави Младеновска.
Таа потенцираше дека со оваа состојба директно се загрозува безбедноста на пациентите и се продолжува нивната неизвесност во процесот на лекување.
„Кој гарантира дека одложувањата се безопасни, кој ќе сноси одговорност ако се случчат компликации поради чекање за операција? На една Влада, секој пациент треба да и биде важен. Здравјето и нечиј живот не смее да се третираат селективно“, додаде таа.
Од опозициската партија ја обвинија власта дека парите од буџетот се трошат за нерелевантни ставки наместо за инвестиции во функционален здравствен систем, посочувајќи дека дефицитот е истрошен, а државата е дополнително задолжена.
„Пациентите не смеат да бидат жртва на неспособноста, негрижата и лошото менаџирање на оваа криминална власт. Бараме итно санирање на дефектот и оспособување на хируршките сали за сите пациенти“, порача Младеновска.