Опозициската СДСМ отвори дилеми за случајот со апсењето на владиниот возач за примање мито, барајќи темелна истрага за целиот процес и одговорност за сите инволвирани.
Одговарајќи на новинарско прашање за тоа дали осомничениот делувал самостојно, членката на Извршниот одбор на СДСМ, Рената Младеновска, истакна дека јавноста со право се сомнева во разврската на ваквите случаи.
„Можам само да додадам дека, како и досега, можеби дел од полицијата си ја врши својата работа, меѓутоа, како и во досегашните случаи, досега никој не одговара“, изјави Младеновска.
Таа потенцираше дека ќе се следи постапката за да се види дали случајот ќе добие соодветна правна завршница или ќе има обиди за негово заташкување.
„Баш да видиме дали во овој случај ќе одговара возачот или само со еден телефонски повик ќе му биде завршена работа и да видиме да се истражи целата процедура, да видиме дали овој човек е само продолжена рака на Игор Јанушев“, изјави Младеновска.