Надзорниот орган на Меѓународниот кривичен суд (МКС) заклучи дека главниот обвинител Карим Кан имал несоодветен сексуален однос со помлад член на персоналот и препорача негово разрешување, се наведува во документ до кој дојде Ројтерс.
Ова е првпат деталите за одлуката за обвинувањата за недолично однесување поднесени од адвокат во 2024 година против Кан, 56-годишен британски адвокат, да бидат објавени јавно, вклучително и препорака да му биде одземена дозволата.
Одлуката на извршното биро на управното тело на МКС ќе влијае на гласањето за негово разрешување во Собранието на земјите-членки, во Њујорк на 24 јули.
Кан постојано негираше дека сторил какво било кривично дело.
Неговите адвокати ја нарекоа одлуката „нелегална, процедурално неправедна и без доволно докази“, осврнувајќи се на претходната проценка на судиите дека обвиненијата не се докажани „без никаков сомнеж“.
Сепак, Бирото на МКС соопшти дека има доволно докази, повикувајќи се на извештајот од едногодишната истрага на Обединетите нации.
Во документот од 27 страници, кој на Ројтерс му го покажаа два независни извори, се тврди дека врската започнала во март 2023 година и дека, поради нерамнотежата на моќта меѓу обвинителот и вработената, таквата врска била неприфатлива, за што Кан се смета дека извршил сериозна злоупотреба на службената должност.
-Неговото однесување со текот на времето се влошило, што резултирало со негов неконсензуален сексуален контакт со неа во неговата канцеларија, во неговата приватна резиденција и за време на неговата мисија, се наведува во документот.
За отстранување на Кан е потребно мнозинство гласови, односно најмалку 63 од 125-те земји-членки на МКС.
Кан, поранешен адвокат кој ја презеде највисоката функција во судот пред пет години, е суспендиран од Меѓународниот кривичен суд (МКС) и независниот британски регулатор за адвокати на судења, кои ќе ја разгледаат неговата иднина во наредните недели.
Поддржувачите на Кан сугерираат дека тој станал политичка цел заради барањето налози за апсење на израелски функционери во 2024 година поради однесувањето на Израел во војната во Газа.
САД воведоа санкции врз 11 судии и обвинители на МКС, вклучувајќи го и Кан, поради налози за апсење на израелскиот премиер Бенјамин Нетанјаху и поранешниот министер за одбрана Јоав Галант, како и поради претходна истрага за американските трупи во Авганистан.
Замениците на Кан го водат обвинителството откако тој замина на доброволно отсуство минатиот мај.